Basketball coach, tinodas ng kainuman sa Oriental Mindoro

Pinaghahanap ngayon ng awtoridad ang suspek sa pagpaslang sa isang playing coach ng basketball sa Barangay Cacawan sa bayan ng Pinamalayan sa Oriental Mindoro nitong Abril 4.

Nakilala ang biktimang si Odie Lacay, 38 taong gulang, delivery boy, at residente ng Sitio Gumamela sa nasabing barangay.

Samantala, natukoy naman ang suspek na si Alvin Atienza Melendrez ng Sitio Santa Ana sa parehas ding barangay.

Sa ulat ng pulisya, pumunta sa bahay ni Melendrez si Lacay bandang 11 ng gabi at nakitagay sa mga taong nadatnan niyang nag-iinuman.

Nagkaroon umano ng pagtatalo ang dalawa bago mangyari ang pamamaril kung saan bumunot ng baril si Melendrez at binaril nang malapitan sa ulo si Lacay na agad nitong ikinamatay.

Matapos ang krimen, dali-daling tumakas ang suspek dala-dala ang kaniyang baril na ginamit. (Ulat ni Jerry Alcayde/Radyo Natin Calapan City)